Rom 10 | MED | STEP | Angmᵾn! Na nga numan ei ndi, pilip kᵾn, Isrel wamp kᵾⱡ Got ndi, etpa tangga nᵾmp atinga rᵾk rᵾk rondᵾr.

Romans 10

1 Angmᵾn! Na nga numan ei ndi, pilip kᵾn, Isrel wamp kᵾⱡ Got ndi, etpa tangga nᵾmp atinga rᵾk rᵾk rondᵾr. 2 Got nga mbi pangga nᵾk, uⱡ mbᵾ ombil pendᵾk etmin. Wote, uⱡ mat pilik kun iti natᵾk etmin ila, na kandᵾp kᵾn, para ndup nᵾt. 3 Got ndi, wamp etpa kun kai mondrum nombuⱡa mam ei, pep rui narᵾk, en enim nga uⱡ ronduⱡ ila, uⱡ mat etamina kᵾn, Got ndi, etpa kun kai mondᵾmba nᵾk pᵾtmᵾn. 4 Mi ik petᵾm mbᵾ, Kraist ndi, pep ropa pora ndurum. Ei nga, wamp nam ti ndi, Kraist kᵾn mondpa pilim ei, Got ndi, kun kai nimba.

Got Ndi Wamp Pora Etᵾp Rukᵾr Timp Nitim

5 Mi ik pep rok, Got kᵾn kun kai muⱡing uⱡ ei nga, Moses ndi, mon ropa nimba mel,

“Wamp nam ti ndi, mi ik mbᵾ pora, pilpa pep rom ndam, kont mba moⱡmba,” nitim.
6 Wote, wamp nam ti mondpa pili uⱡ ila moⱡnga, Got ndi, etpa kun kai mondrum wamp ei ndi, nimba mel,

“Nim ninim nga numa ei ndi, ik ei mel ni nᵾni! Wamp nam ti, muⱡ kona oⱡa mba?
(Kraist mepa mana urum.)
7 Muna,

“Wamp nam ti, wamp kui kona ila mana mba?
(Kraist ropa rut ndupa mepa wangga tᵾn tᵾpa rapᵾndᵾmba nda?)
Nᵾtᵾn ik ei, ko tᵾkᵾn pili nᵾpili ku,” ” nᵾtᵾm.
8 Uⱡ ei nga, Buk Wingti ei ndi, nimba mel, “Ei ik kᵾⱡ, int enim kᵾn, nondpa telinga, mundmong ila pilik, keta ila nᵾk ekit ndurmin,” nᵾtᵾm. Got nga ik mong kᵾⱡ, tᵾn mbun pilpᵾn kᵾn, enim kundᵾp nᵾtmᵾn. 9 Ei nga, nim nga keta ila, Jisas wu Nuim nᵾkᵾn, wote nim nga mundmong ila, Got ndi, Jisas ni, on kona ila, ropa rᵾt ndurum, nᵾkᵾn mondkᵾn pin ndam, nim etpa tᵾmba. 10 Wote, tᵾn nga mundmong ila mondᵾp pᵾtmᵾn ei kᵾn, Got ndi, tᵾn kun kai nᵾtᵾm. Wote keta ila, Jisas nga para ndupᵾn nᵾtmᵾn ei kᵾn, tᵾn etpa tᵾtᵾm.

11 Uⱡ ei nga, Buk Wingti ila, nimba mel,

“Wamp nam ti, elim mondpa pilpa moⱡum ti, pipil kuⱡi naⱡᵾmba,” nᵾtᵾm.
12 Ei kᵾn, Got ndi, wamp mbᵾ pora, to tenda ila kandrᵾm. Jura wamp na, wamp rᵾⱡaip elpa na mbᵾ, tᵾpa tenda etpa, Jisas Nuim rak ndupa ei morum. Wamp nam ti, elim mbi tek angᵾndᵾk nᵾng wamp mbᵾ, memp pendᵾmba. 13 Buk Wingti ei ndi, nimba mel,

“Wamp nam ti, Oⱡa Nuim ei nga mbi tepa angᵾndpa, nim wamp ti, etpa tᵾmba,” nᵾtᵾm.
14 Wote, elim mondᵾk pili napiling ndam, namba etᵾk, mbi tek angᵾndᵾk ning? Wote, elim nga ik ei pili napiling ndam, namba etᵾk mondᵾk piling? Wote, elim nga ik ei, ni nanᵾng ndam, namba etᵾk kum tek piling? 15 Nombuⱡa rung wu mat, tᵾk mundi namᵾndᵾⱡina ndam, Rᵾnang Ik Kai ei nilingina, mel nant? Buk Wingti ei ndi nimba mel,

“Rᵾnang Ik Kai nᵾk nguing onmᵾn, wu kᵾⱡ kᵾmp nengina noⱡnga, uⱡ kai ti etᵾk onmᵾn!” nᵾtmᵾn.
16 Wote wamp mbᵾ, Rᵾnang Ik Kai ei, pilik ti natᵾtᵾng. Ei nga, painui wu Aisaiya ndi, nimba mel,

“Nuim ye! Wamp nam ti ndi, na nga ik nᵾmp ngur ei pilpa titim?” nitim.
17 Wote ni kᵾn, nombuⱡa rung ik ei, Kraist nga ik nᵾndᵾtmᵾn ila ekit orum. Ei nga, Got nga ik mong ei, pilingina kᵾn, mondpa pili uⱡ ei oⱡa orum. 18 Wote na ndi, ik waldᵾp nᵾnt ei, ik ei, enim Jura wamp kᵾⱡ, kupa pili napᵾtmᵾn ei? Ei mon. Pᵾtmin ei ka! Buk Wingti ei ndi, nimba mel,

“Got nga ik ei, kona mbila pora purum. Ik ei mba, mᵾi kᵾmp mbila, tepa kapⱡa inditim,” nitim.
19 Aldpa, na waldᵾp, nᵾmp mel, “Isrel wamp mbᵾ, ik ei kupa pili napᵾtmᵾn ei?” Moses elim ndi, ik ei nga punt ropa nimba mel,

“Na ndi, wamp roldᵾnga mat ruk tamba, enim wamp mbᵾ kᵾn wᵾlᵾk ru-ing. Na ndi, wamp numan kun pi nᵾpi mat, rukᵾr tamba, enim popuⱡ kuⱡing,” nitim.
20 Wote, Buk Wingti ila Painui wu Aisaiya ndi, ronduⱡ mundpa, nimba mel,

“Na kuri nakᵾrᵾrᵾng wamp kat ndi, na kandᵾk tᵾtᵾng, Na wuldi nawᵾldᵾtᵾng wamp mbᵾ kᵾn, mot nga ur,” nitim.
21 Wote, Isrel wamp mbᵾ nga nimba mel,

“Wote, ui roⱡ etᵾp na nga ki ei run ndup wamp kᵾⱡ, etᵾp timp nᵾmp elimba. Wote wamp mbᵾ, ik tᵾk roi nduk, ik kit nᵾk etᵾng,” nitim.